uljhan mein hast-o-bud ki yun mubtala hun main

uljhan meñ hast-o-būd kī yuuñ mubtalā huuñ maiñ

ḳhud apnā aks huuñ ki tirā aa.ina huuñ maiñ

mujh ko kiyā hai lā.iq-e-sajda isī liye

ajzā-e-kā.enāt meñ sab se judā huuñ maiñ

tū ek hai magar haiñ tire an-ginat majāz

har aa.ine meñ tere numāyāñ huā huuñ maiñ

tishna-labī meñ zabt ho aur vo bhī us ghaḌī

jab ittifāq se lab-e-dariyā khaḌā huuñ maiñ

mānind-e-kahkashāñ ye miTātī hai tīrgī

paḌh kar kitāb-e-ishq ko raushan huā huuñ maiñ

āsūdgī ko chhoḌ vo hāsil rahī mujhe

lekin mohabbatoñ ko tarastā rahā huuñ maiñ

dariyā sifat bhī ho ke na sairāb kar sakā

barse binā jo chhaT ga.ī aisī ghaTā huuñ maiñ

dast-e-jafā se jis ke ye vahshat mujhe milī

us ko bhī hai gila ki darinda-numā huuñ maiñ

tanhā.ī meñ ik ālam-e-imkāñ basā liyā

'ādil' yuuñ apne aap meñ kuchh DhūñDhtā huuñ maiñ

uljhan mein hast-o-bud ki yun mubtala hun main

KHud apna aks hun ki tera aaina hun main

mujh ko kiya hai laiq-e-sajda isi liye

ajza-e-kaenat mein sab se juda hun main

tu ek hai magar hain tere an-ginat majaz

har aaine mein tere numayan hua hun main

tishna-labi mein zabt ho aur wo bhi us ghaDi

jab ittifaq se lab-e-dariya khaDa hun main

manind-e-kahkashan ye miTati hai tirgi

paDh kar kitab-e-ishq ko raushan hua hun main

aasudgi ko chhoD wo hasil rahi mujhe

lekin mohabbaton ko tarasta raha hun main

dariya sifat bhi ho ke na sairab kar saka

barse bina jo chhaT gai aisi ghaTa hun main

dast-e-jafa se jis ke ye wahshat mujhe mili

us ko bhi hai gila ki darinda-numa hun main

tanhai mein ek aalam-e-imkan basa liya

'adil' yun apne aap mein kuchh DhunDhta hun main