uljhanen itni thin manzar aur pas-manzar ke bich

uljhaneñ itnī thiiñ manzar aur pas-manzar ke biich

rah ga.ī saarī masāfat miil ke patthar ke biich

ruḳh se ye parda haTā behosh kar mujh ko tabīb

guftugū jitnī bhī ho phir zaḳhm aur nashtar ke biich

us ko kyā ma.alūm ahvāl-e-dil-e-shīsha-garāñ

varna aa jaatā kabhī to haath aur patthar ke biich

shauq-e-sajda bandagī vāraftagī aur be-ḳhudī

mo'tabar sab us kī chaukhaT aur mere sar ke biich

ik qayāmat husn us kā aur vo bhī jalva-gar

maiñ faqat mab.hūt jaadū aur jādūgar ke biich

maiñ bhī ḳhuddārī kā maarā thā safā.ī kuchh na dī

us ne bhī matlab nikāle lafz aur tevar ke biich

vaqt aur masrūfiyat ke mas.ale sab ik taraf

dūriyāñ itnī nahīñ thiiñ 'tāj' apne ghar ke biich

uljhanen itni thin manzar aur pas-manzar ke bich

rah gai sari masafat mil ke patthar ke bich

ruKH se ye parda haTa behosh kar mujh ko tabib

guftugu jitni bhi ho phir zaKHm aur nashtar ke bich

us ko kya malum ahwal-e-dil-e-shisha-garan

warna aa jata kabhi to hath aur patthar ke bich

shauq-e-sajda bandagi waraftagi aur be-KHudi

mo'tabar sab us ki chaukhaT aur mere sar ke bich

ek qayamat husn us ka aur wo bhi jalwa-gar

main faqat mabhut jadu aur jadugar ke bich

main bhi KHuddari ka mara tha safai kuchh na di

us ne bhi matlab nikale lafz aur tewar ke bich

waqt aur masrufiyat ke masale sab ek taraf

duriyan itni nahin thin 'taj' apne ghar ke bich