uljhi hui hai zulf-e-tarah-dar in dinon

uljhī huī hai zulf-e-tarah-dār in dinoñ

pathrā ga.ī hai chashm-e-fusūñ-kār in dinoñ

gul kī adā-o-shoḳhī mayassar kahāñ hameñ

haa.il hai rah meñ baaġh kī dīvār in dinoñ

kyā sāniha huā hai ki bāzār-e-shauq meñ

dikhtā nahīñ hai koī ḳharīdār in dinoñ

kaisī vafā kahāñ kā junūñ kyā ḳhayāl-e-yār

lagte haiñ saare qisse ye be-kār in dinoñ

ham zindagī ke bojh se haiñ tang is qadar

tār-e-nafas bhī siine pe hai baar in dinoñ

ai 'ishq tujh pe kaisā burā vaqt aa gayā

marne ke bhī nahīñ tire bīmār in dinoñ

uljhi hui hai zulf-e-tarah-dar in dinon

pathra gai hai chashm-e-fusun-kar in dinon

gul ki ada-o-shoKHi mayassar kahan hamein

hail hai rah mein bagh ki diwar in dinon

kya saniha hua hai ki bazar-e-shauq mein

dikhta nahin hai koi KHaridar in dinon

kaisi wafa kahan ka junun kya KHayal-e-yar

lagte hain sare qisse ye be-kar in dinon

hum zindagi ke bojh se hain tang is qadar

tar-e-nafas bhi sine pe hai bar in dinon

ai 'ishq tujh pe kaisa bura waqt aa gaya

marne ke bhi nahin tere bimar in dinon