ulTa hi duaon ka asar dekh liya hai

ulTā hī duāoñ kā asar dekh liyā hai

ab to mirā āfāt ne ghar dekh liyā hai

ab chain kahāñ rāhat-o-ārām kahāñ kā

jannat meñ jo mamnuā shajar dekh liyā hai

bas hājat-e-ehsān nahīñ hai ki ab ham ne

jañgal meñ bayābān meñ ghar dekh liyā hai

kyā chain mile mujh ko sukūñ kyoñ ho mayassar

bechain usī chashm ko tar dekh liyā hai

vaise to koī shaḳhs bhī aiboñ se nahīñ paak

muñh band rakho phir bhī agar dekh liyā hai

phan saañp kī mānind uThāyā hai jinhoñ ne

aisoñ kā to kuchlā huā sar dekh liyā hai

bachchoñ pe luTā dī thī pasīne kī kamā.ī

'hasrat' jo milā un se samar dekh liyā hai

ulTa hi duaon ka asar dekh liya hai

ab to mera aafat ne ghar dekh liya hai

ab chain kahan rahat-o-aram kahan ka

jannat mein jo mamnua shajar dekh liya hai

bas hajat-e-ehsan nahin hai ki ab hum ne

jangal mein bayaban mein ghar dekh liya hai

kya chain mile mujh ko sukun kyon ho mayassar

bechain usi chashm ko tar dekh liya hai

waise to koi shaKHs bhi aibon se nahin pak

munh band rakho phir bhi agar dekh liya hai

phan sanp ki manind uThaya hai jinhon ne

aison ka to kuchla hua sar dekh liya hai

bachchon pe luTa di thi pasine ki kamai

'hasrat' jo mila un se samar dekh liya hai