ulTi paDti hai har ek kaam ki tadbir abas

ulTī paḌtī hai har ik kaam kī tadbīr abas

mujh se bargashta huī hai mirī taqdīr abas

jo muqaddar meñ likhā hai nahīñ miTne vaalā

aah be-kār hai aur nāla-e-shabgīr abas

koī baaqī nahīñ fariyād kā sunñe vaalā

shor kartī hai mire paañv kī zanjīr abas

shauq kahtā hai mirā mujh se jo honā hai vo ho

qatl karne meñ hai jallād ko tāḳhīr abas

kah diyā uqda-e-tadīr kā khulnā dushvār

dil samajh le ḳhalish-e-nāḳhun-e-tadbīr abas

aap kuchh mujh se ab ai hazrat-e-nāseh na kaheñ

guftugū aap kī be-kār hai taqrīr abas

jāñ-setāñ tīr-e-nazar yuuñ bhī hai us kā 'mas.ūd'

khīñchtā hai vo mire qatl pe shamshīr abas

ulTi paDti hai har ek kaam ki tadbir abas

mujh se bargashta hui hai meri taqdir abas

jo muqaddar mein likha hai nahin miTne wala

aah be-kar hai aur nala-e-shabgir abas

koi baqi nahin fariyaad ka sunne wala

shor karti hai mere panw ki zanjir abas

shauq kahta hai mera mujh se jo hona hai wo ho

qatl karne mein hai jallad ko taKHir abas

kah diya uqda-e-tadir ka khulna dushwar

dil samajh le KHalish-e-naKHun-e-tadbir abas

aap kuchh mujh se ab ai hazrat-e-naseh na kahen

guftugu aap ki be-kar hai taqrir abas

jaan-setan tir-e-nazar yun bhi hai us ka 'masud'

khinchta hai wo mere qatl pe shamshir abas