umr baDhti ja rahi hai zist ghaTti jae hai

umr baḌhtī jā rahī hai ziist ghaTtī jaa.e hai

jism kī ḳhushbū kī ḳhvāhish duur haTtī jaa.e hai

soch meñ bhī ab nahīñ pahlā sā tevar aur loch

shauq kī dīvār gard-e-ġham se uThtī jaa.e hai

be-maza hone lagī hai zindagī ba.ad-e-shabāb

raat abhī baaqī hai lekin niiñd uchaTtī jaa.e hai

aa rahī hai sukh milan kī champa.ī ujlī sahar

dukh kī ye bechain añdherī rain kaTtī jaa.e hai

yaas ke hassās lamhoñ meñ bhī hai kitnā surūr

shāhida ummīd kī mujh se lipaTtī jaa.e hai

kaam kī ifrāt meñ daftar ke hañgāmoñ meñ bhī

terī yaad aa.e tavajjoh merī baTtī jaa.e hai

hai badan chuur aur komal kis qadar chit-chor shaam

jaise sharmīlī dulhan ḳhud meñ simaTtī jaa.e hai

hai vo chanchal kāmanī mahbūb saare shahr ko

dekh kar jis ko nazar merī palaTtī jaa.e hai

bāb-e-hasrat dāstān-e-shauq tasvīr-e-umīd

lamha lamha zindagī aurāq ulaTtī jaa.e hai

jaag uThī hai jīv-jyotī aas aur vishvās kī

'krishn-mohan' kālimā dubidhā kī chhaTtī jaa.e hai

umr baDhti ja rahi hai zist ghaTti jae hai

jism ki KHushbu ki KHwahish dur haTti jae hai

soch mein bhi ab nahin pahla sa tewar aur loch

shauq ki diwar gard-e-gham se uThti jae hai

be-maza hone lagi hai zindagi baad-e-shabab

raat abhi baqi hai lekin nind uchaTti jae hai

aa rahi hai sukh milan ki champai ujli sahar

dukh ki ye bechain andheri rain kaTti jae hai

yas ke hassas lamhon mein bhi hai kitna surur

shahida ummid ki mujh se lipaTti jae hai

kaam ki ifraat mein daftar ke hangamon mein bhi

teri yaad aae tawajjoh meri baTti jae hai

hai badan chur aur komal kis qadar chit-chor sham

jaise sharmili dulhan KHud mein simaTti jae hai

hai wo chanchal kaamani mahbub sare shahr ko

dekh kar jis ko nazar meri palaTti jae hai

bab-e-hasrat dastan-e-shauq taswir-e-umid

lamha lamha zindagi auraq ulaTti jae hai

jag uThi hai jiw-jyoti aas aur wishwas ki

'krishn-mohan' kalima dubidha ki chhaTti jae hai