umr-bhar KHun se likkha hai jis afsane ko

umr-bhar ḳhuun se likkhā hai jis afsāne ko

kitnā kam rañg hai us shoḳh ke nazrāne ko

khiltī rahtī haiñ tire pyaar kī kaliyāñ har-sū

baaġh nīlām na kar deñ mire vīrāne ko

mai se raġhbat to mujhe bhī hai magar bas itnī

nāchte dekh liyā duur se paimāne ko

aur martā kahīñ jā kar tire dar se lekin

hosh itnā bhī kahāñ thā tire dīvāne ko

kyā ḳhabar thī ye tirā dar ye tirā kūcha hai

maiñ to bas baiTh gayā thā zarā sustāne ko

sham.a jalne kī ijāzat nahīñ detī 'aḳhtar'

shauq bujhne nahīñ detā mire parvāne ko

umr-bhar KHun se likkha hai jis afsane ko

kitna kam rang hai us shoKH ke nazrane ko

khilti rahti hain tere pyar ki kaliyan har-su

bagh nilam na kar den mere virane ko

mai se raghbat to mujhe bhi hai magar bas itni

nachte dekh liya dur se paimane ko

aur marta kahin ja kar tere dar se lekin

hosh itna bhi kahan tha tere diwane ko

kya KHabar thi ye tera dar ye tera kucha hai

main to bas baiTh gaya tha zara sustane ko

shama jalne ki ijazat nahin deti 'aKHtar'

shauq bujhne nahin deta mere parwane ko