umr bhar ki dosti ka han bharam rakkha na tha

umr bhar kī dostī kā haañ bharam rakkhā na thā

ba.ad muddat ke khulā mujh pe ki vo merā na thā

yuuñ jalā.e zindagī bhar maiñ ne yādoñ ke charāġh

sāmne jin ke charāġh-e-dīgarāñ jaltā na thā

kal maiñ us kī guftugū suntī rahī suntī rahī

is mohabbat se vo pahle to kabhī bolā na thā

kuchh to andāza thā mujh ko us kī āñkhoñ kā magar

dil kī hālat kā ye us ne baab yuuñ kholā na thā

sochtī huuñ kyuuñ maiñ jaise guñg ho kar rah ga.ī

is tarah siine meñ dil pahle kabhī dhaḌkā na thā

e'tirāf-e-ishq ne namnāk kī āñkheñ mirī

aañkh meñ kājal qasam hai is tarah phailā na thā

us kī ḳhvāhish thī so 'farḳhanda' maiñ qaa.il ho ga.ī

vo payām-e-ishq bhejegā kabhī sochā na thā

umr bhar ki dosti ka han bharam rakkha na tha

baad muddat ke khula mujh pe ki wo mera na tha

yun jalae zindagi bhar main ne yaadon ke charagh

samne jin ke charagh-e-digaran jalta na tha

kal main us ki guftugu sunti rahi sunti rahi

is mohabbat se wo pahle to kabhi bola na tha

kuchh to andaza tha mujh ko us ki aankhon ka magar

dil ki haalat ka ye us ne bab yun khola na tha

sochti hun kyun main jaise gung ho kar rah gai

is tarah sine mein dil pahle kabhi dhaDka na tha

e'tiraf-e-ishq ne namnak ki aankhen meri

aankh mein kajal qasam hai is tarah phaila na tha

us ki KHwahish thi so 'farKHanda' main qail ho gai

wo payam-e-ishq bhejega kabhi socha na tha