umr bhar Thokaren kha kha ke sanbhalte rahna

umr bhar Thokareñ khā khā ke sañbhalte rahnā

hausla jiine kā rakhte ho to chalte rahnā

vasl kī raat ho har roz badan kī ḳhvāhish

ḳhaslat-e-ishq hai tā-umr machalte rahnā

sochtā huuñ to bahut der talak hañstā huuñ

merā din bhar tirī galiyoñ meñ Tahalte rahnā

ye duā de ke kahā us ne ke māshā-allāh

jaan se jaane talak ḳhuun ugalte rahnā

roz-dar-roz yahāñ aabrū luT jaatī hai

itnā āsān kahāñ ghar se nikalte rahnā

is na.e daur meñ chhū lete bulandī lekin

ham ne sīkhā hī nahīñ rang badalte rahnā

ab to shāyad hai yahī apnā muqaddar 'rizvān'

sochnā tujh ko tire hijr meñ jalte rahnā

umr bhar Thokaren kha kha ke sanbhalte rahna

hausla jine ka rakhte ho to chalte rahna

wasl ki raat ho har roz badan ki KHwahish

KHaslat-e-ishq hai ta-umr machalte rahna

sochta hun to bahut der talak hansta hun

mera din bhar teri galiyon mein Tahalte rahna

ye dua de ke kaha us ne ke masha-allah

jaan se jaane talak KHun ugalte rahna

roz-dar-roz yahan aabru luT jati hai

itna aasan kahan ghar se nikalte rahna

is nae daur mein chhu lete bulandi lekin

hum ne sikha hi nahin rang badalte rahna

ab to shayad hai yahi apna muqaddar 'rizwan'

sochna tujh ko tere hijr mein jalte rahna