umr guzri isi maidan ko sar karne mein

umr guzrī isī maidān ko sar karne meñ

jo makāñ ham ko milā thā use ghar karne meñ

ishq āsān kahāñ umr guzar jaatī hai

apnī jānib kisī ġhāfil kī nazar karne meñ

āzmā.ish se to be-chārī ġhazal bhī guzrī

ik shahanshāh bahādur ko zafar karne meñ

sub.h ke ba.ad bhī kuchh logoñ kī nīndeñ na khulīñ

aur ham TuuT ga.e shab ko sahar karne meñ

laakh dushvār ho dil ko to sukūñ miltā hai

zindagī apne tarīqe se basar karne meñ

rañg lā.eñgī tamannā.eñ zarā sabr karo

vaqt lagtā hai duāoñ ko asar karne meñ

umr guzri isi maidan ko sar karne mein

jo makan hum ko mila tha use ghar karne mein

ishq aasan kahan umr guzar jati hai

apni jaanib kisi ghafil ki nazar karne mein

aazmaish se to be-chaari ghazal bhi guzri

ek shahanshah bahadur ko zafar karne mein

subh ke baad bhi kuchh logon ki ninden na khulin

aur hum TuT gae shab ko sahar karne mein

lakh dushwar ho dil ko to sukun milta hai

zindagi apne tariqe se basar karne mein

rang laengi tamannaen zara sabr karo

waqt lagta hai duaon ko asar karne mein