un ke baghair hum jo gulistan mein aa gae

un ke baġhair ham jo gulistāñ meñ aa ga.e

mahsūs ye huā ki bayābāñ meñ aa ga.e

tash.hīr-e-dil-giriftagī-e-husn ho ga.ī

aañsū chhalak ke chashm-e-pashemāñ meñ aa ga.e

ham tark-e-rabt-o-zabt-e-mohabbat ke bāvajūd

sau baar khiñch ke kūcha-e-jānāñ meñ aa ga.e

phūloñ ko raas aayā na jab arsa-e-bahār

gulshan se haT ke gosha-e-dāmāñ meñ aa ga.e

har-chand ahl-e-hosh the arbāb-e-zindagī

lekin fareb-e-gardish-e-daurāñ meñ aa ga.e

aayā mirī zabāñ pe yakāyak jo un kā naam

kis kis ke haath mere garebāñ meñ aa ga.e

chhup kar nigāh-e-shauq se dil meñ panāh lī

dil meñ na chhup sake to rag-e-jāñ meñ aa ga.e

the muntashar azal meñ jo zarrāt-e-kū-e-dost

insān ban ke ālam-e-imkāñ meñ aa ga.e

jinkī adā adā meñ haiñ ra.anā.iyāñ 'shakīl'

ash.ār ban ke vo mire dīvāñ meñ aa ga.e

un ke baghair hum jo gulistan mein aa gae

mahsus ye hua ki bayaban mein aa gae

tashhir-e-dil-giriftagi-e-husn ho gai

aansu chhalak ke chashm-e-pasheman mein aa gae

hum tark-e-rabt-o-zabt-e-mohabbat ke bawajud

sau bar khinch ke kucha-e-jaanan mein aa gae

phulon ko ras aaya na jab arsa-e-bahaar

gulshan se haT ke gosha-e-daman mein aa gae

har-chand ahl-e-hosh the arbab-e-zindagi

lekin fareb-e-gardish-e-dauran mein aa gae

aaya meri zaban pe yakayak jo un ka nam

kis kis ke hath mere gareban mein aa gae

chhup kar nigah-e-shauq se dil mein panah li

dil mein na chhup sake to rag-e-jaan mein aa gae

the muntashar azal mein jo zarraat-e-ku-e-dost

insan ban ke aalam-e-imkan mein aa gae

jinki ada ada mein hain ranaiyan 'shakil'

ashaar ban ke wo mere diwan mein aa gae