un ke huzur nazr-e-mayassar hi le chalen

un ke huzūr nazr-e-mayassar hī le chaleñ

aañsū nahīñ to ḳhushk samundar hī le chaleñ

iḳhlās chāhtā hai unheñ apnā ham-safar

vo ḳhvāh āstīn meñ ḳhanjar hī le chaleñ

ham izn-e-arz-e-hāl pe ab kashmakash meñ haiñ

dil ko ye zid hai shauq kā daftar hī le chaleñ

ganj-e-qafas meñ hogī na ye bazm-e-rang-o-bū

manzar jo sāmne hai vo manzar hī le chaleñ

dāman meñ gul nahīñ to barā-e-subūt-e-sair

sehn-e-chaman se ḳhaar ke nashtar hī le chaleñ

sarmāya-e-'urūj' haiñ taaza ġhazal ke phuul

bazm-e-suḳhan meñ shāḳh-e-gul-e-tar hī le chaleñ

un ke huzur nazr-e-mayassar hi le chalen

aansu nahin to KHushk samundar hi le chalen

iKHlas chahta hai unhen apna ham-safar

wo KHwah aastin mein KHanjar hi le chalen

hum izn-e-arz-e-haal pe ab kashmakash mein hain

dil ko ye zid hai shauq ka daftar hi le chalen

ganj-e-qafas mein hogi na ye bazm-e-rang-o-bu

manzar jo samne hai wo manzar hi le chalen

daman mein gul nahin to bara-e-subut-e-sair

sehn-e-chaman se KHar ke nashtar hi le chalen

sarmaya-e-'uruj' hain taza ghazal ke phul

bazm-e-suKHan mein shaKH-e-gul-e-tar hi le chalen