un ke jaur-e-behad ko bhi KHamoshi se sahta hun

un ke jaur-e-behad ko bhī ḳhāmoshī se sahtā huuñ

jaane kin mauhūm ummīdoñ kī rau meñ maiñ bahtā huuñ

tum kyā jaano in bātoñ se tum to duur hī rahte ho

maiñ jo bāteñ tanhā.ī meñ dil se kartā rahtā huuñ

aaj tumhāre paas huuñ lekin tum ko koī qadr nahīñ

kal tum ḳhud sab se pūchhoge maiñ kis desh meñ rahtā huuñ

zulf-e-hastī ko suljhāna aaj ke daur kā manshā hai

maiñ bechāra ishq ke jhagḌoñ hī meñ khoyā rahtā huuñ

kal thiiñ ġhair kī kaḌvī bāteñ aaj tumhāre charche haiñ

kal bhī sab kuchh sahtā thā maiñ aaj bhī sab kuchh sahtā huuñ

mere andar kā zaḳhmī dil apnā dard sunātā hai

aur zamāne par ye zāhir hai maiñ bhī kuchh kahtā huuñ

farsh-nashīñ ko arsh-nashīnī se 'sarvar' kyā nisbat hai

lekin maiñ aise hī ḳhvāboñ ke chakkar meñ rahtā huuñ

un ke jaur-e-behad ko bhi KHamoshi se sahta hun

jaane kin mauhum ummidon ki rau mein main bahta hun

tum kya jaano in baaton se tum to dur hi rahte ho

main jo baaten tanhai mein dil se karta rahta hun

aaj tumhaare pas hun lekin tum ko koi qadr nahin

kal tum KHud sab se puchhoge main kis desh mein rahta hun

zulf-e-hasti ko suljhana aaj ke daur ka mansha hai

main bechaara ishq ke jhagDon hi mein khoya rahta hun

kal thin ghair ki kaDwi baaten aaj tumhaare charche hain

kal bhi sab kuchh sahta tha main aaj bhi sab kuchh sahta hun

mere andar ka zaKHmi dil apna dard sunata hai

aur zamane par ye zahir hai main bhi kuchh kahta hun

farsh-nashin ko arsh-nashini se 'sarwar' kya nisbat hai

lekin main aise hi KHwabon ke chakkar mein rahta hun