un ke kuche ki taraf aaj jo hum ja nikle

un ke kūche kī taraf aaj jo ham jā nikle

bole jo nikle idhar us kā janāza nikle

ḳhalq kahtī sar-e-bāzār vo rusvā nikle

uTh ga.e haath jidhar ko tire shaidā nikle

rabt pahlā sā to un se nahīñ lekin ab bhī

is qadar hai ki jo uTThe to kabhī jā nikle

itr bistar pe malūñ phuul chunūñ takiyoñ par

shab-e-va.ada hai ḳhudā jaane vo kab aa nikle

vaqt-e-bad pūchh ke aatā nahīñ chheḌūñ kyūñkar

is hañsī meñ na kahīñ aur hī jhagḌā nikle

aisī mujh juzv ko us kul se hai nisbat jaise

qatra dariyā se ho aur qatre se dariyā nikle

haa.e jis tiir ko maiñ dil meñ jagah duuñ ai 'ranj'

kyā vahī tiir mere ḳhuun kā pyāsā nikle

un ke kuche ki taraf aaj jo hum ja nikle

bole jo nikle idhar us ka janaza nikle

KHalq kahti sar-e-bazar wo ruswa nikle

uTh gae hath jidhar ko tere shaida nikle

rabt pahla sa to un se nahin lekin ab bhi

is qadar hai ki jo uTThe to kabhi ja nikle

itr bistar pe malun phul chunun takiyon par

shab-e-wada hai KHuda jaane wo kab aa nikle

waqt-e-bad puchh ke aata nahin chheDun kyunkar

is hansi mein na kahin aur hi jhagDa nikle

aisi mujh juzw ko us kul se hai nisbat jaise

qatra dariya se ho aur qatre se dariya nikle

hae jis tir ko main dil mein jagah dun ai 'ranj'

kya wahi tir mere KHun ka pyasa nikle