un kī ruḳhsat ik qayāmat thī dam-e-iz.hār-e-sub.h
shaam tak bachtā nazar aatā nahīñ bīmār-e-sub.h
mujh ko bhī ai sham.a ro le vasl kī shab hai aḳhīr
aur do aañsū bahā ai kushta-e-āzār-e-sub.h
kho diyā tūl-e-shab-e-furqat ne lutf-e-intizār
dīda-e-be-ḳhvāb ko hai hasrat-e-dīdār-e-sub.h
vasl kī shab bujh gayā thā jo hamārā dāġh-e-dil
mehr ban kar ab vahī hai turra-e-dastār-e-sub.h
sub.h se pahle ulaT dī us ne chehre se naqāb
ab koī kāfir bhī kar saktā nahīñ inkār-e-sub.h
raat bhar merī zabāñ par sar-guzasht-e-shām-e-ġham
un ke lab haiñ āshnā-e-lazzat-e-guftār-e-sub.h
vasl kī be-lutfiyāñ bhī lutf se ḳhālī nahīñ
raat bhar dil ko maza detī rahī takrār-e-sub.h
iid milne aa.eñ vo gar iid kā niklā hai chāñd
shaam aa.e saath le kar daulat-e-bedār-e-sub.h
vasl meñ hai apnī qismat kī ḳhalish bhī yādgār
dāman-e-shab se ulajh jaate haiñ aksar ḳhār-e-sub.h
de subūhī jald saaqī ab nahīñ māh-e-siyām
be-sabab kyuuñ raah dekheñ shaam kī mai-ḳhvār-e-sub.h
dekhnā kyā jald guzrī hai shab-e-va.ada 'nazar'
vo idhar aa.e udhar zāhir hue āsār-e-sub.h
un ki ruKHsat ek qayamat thi dam-e-izhaar-e-subh
sham tak bachta nazar aata nahin bimar-e-subh
mujh ko bhi ai shama ro le wasl ki shab hai aKHir
aur do aansu baha ai kushta-e-azar-e-subh
kho diya tul-e-shab-e-furqat ne lutf-e-intizar
dida-e-be-KHwab ko hai hasrat-e-didar-e-subh
wasl ki shab bujh gaya tha jo hamara dagh-e-dil
mehr ban kar ab wahi hai turra-e-dastar-e-subh
subh se pahle ulaT di us ne chehre se naqab
ab koi kafir bhi kar sakta nahin inkar-e-subh
raat bhar meri zaban par sar-guzasht-e-sham-e-gham
un ke lab hain aashna-e-lazzat-e-guftar-e-subh
wasl ki be-lutfiyan bhi lutf se KHali nahin
raat bhar dil ko maza deti rahi takrar-e-subh
id milne aaen wo gar id ka nikla hai chand
sham aae sath le kar daulat-e-bedar-e-subh
wasl mein hai apni qismat ki KHalish bhi yaadgar
daman-e-shab se ulajh jate hain aksar KHar-e-subh
de subuhi jald saqi ab nahin mah-e-siyam
be-sabab kyun rah dekhen sham ki mai-KHwar-e-subh
dekhna kya jald guzri hai shab-e-wada 'nazar'
wo idhar aae udhar zahir hue aasar-e-subh
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.