unki Thokar ban gai hai roz-e-mahshar ka jawab

un kī Thokar ban ga.ī hai roz-e-mahshar kā javāb

roz-e-mahshar dekhiye kis din ho Thokar kā javāb

ho nahīñ saktā sitamgar tere ḳhanjar kā javāb

ḳhuun thukvāne lagā us misrā-e-tar kā javāb

tīra-qismat huuñ dikhā.ūñgā gar un ko aa.ina

aa.ina ban jā.egā sadd-e-sikandar kā javāb

ḳhuuñ vahāñ gardan pe ho yaañ ashk-e-ḳhūnī aañkh meñ

kaash ho un kī surāhī mere sāġhar kā javāb

phir kahūñgā phir kahūñgā bosa-e-lab ke liye

hoñToñ hoñToñ meñ na do arz-e-mukarrar kā javāb

hijr kī shab fikr-e-mazmūn-e-ruḳh-e-pur-nūr hai

likh rahā huuñ maiñ bayāz-e-sub.h-e-mahshar kā javāb

yā sanam maiñ ne kahā vo gāliyāñ dene lage

ye masal sach ho ga.ī patthar hai patthar kā javāb

gir paḌā maiñ sar ke bal qurbān us andāz ke

un kī añgḌā.ī huī mehrāb-e-ḳhanjar kā javāb

dekhte hī mere ḳhat ko ho ga.e chīñ-bar-jabīñ

chaar satroñ meñ diyā hai saare daftar kā javāb

ḳhāna-e-gil meñ hai kyā jo ḳhāna-e-dil meñ nahīñ

ghar butoñ kā ho gayā allāh ke ghar kā javāb

vo nigāheñ ye jigar vo sang dil ye resh dil

aabla hai ḳhaar kā shīsha hai patthar kā javāb

intizār-e-nāma-e-dilbar meñ 'rāsiḳh' kyā kahūñ

sāmne aaya mire mere muqaddar kā javāb

un ki Thokar ban gai hai roz-e-mahshar ka jawab

roz-e-mahshar dekhiye kis din ho Thokar ka jawab

ho nahin sakta sitamgar tere KHanjar ka jawab

KHun thukwane laga us misra-e-tar ka jawab

tira-qismat hun dikhaunga gar un ko aaina

aaina ban jaega sadd-e-sikandar ka jawab

KHun wahan gardan pe ho yan ashk-e-KHuni aankh mein

kash ho un ki surahi mere saghar ka jawab

phir kahunga phir kahunga bosa-e-lab ke liye

honTon honTon mein na do arz-e-mukarrar ka jawab

hijr ki shab fikr-e-mazmun-e-ruKH-e-pur-nur hai

likh raha hun main bayaz-e-subh-e-mahshar ka jawab

ya sanam main ne kaha wo galiyan dene lage

ye masal sach ho gai patthar hai patthar ka jawab

gir paDa main sar ke bal qurban us andaz ke

un ki angDai hui mehrab-e-KHanjar ka jawab

dekhte hi mere KHat ko ho gae chin-bar-jabin

chaar satron mein diya hai sare daftar ka jawab

KHana-e-gil mein hai kya jo KHana-e-dil mein nahin

ghar buton ka ho gaya allah ke ghar ka jawab

wo nigahen ye jigar wo sang dil ye resh dil

aabla hai KHar ka shisha hai patthar ka jawab

intizar-e-nama-e-dilbar mein 'rasiKH' kya kahun

samne aaya mere mere muqaddar ka jawab