un ko dekha to tabiat mein rawani aai

un ko dekhā to tabī.at meñ ravānī aa.ī

dil ke ujḌe hue gulshan pe javānī aa.ī

pyaas kyā us kī bujhā.eñge koī āriz-o-lab

lab-e-dariyā na jise pyaas bujhānī aa.ī

garmī-e-ranj-o-alam hī meñ basar kī ham ne

zindagī meñ to koī rut na suhānī aa.ī

us kā unvān tirā naam hī rakkhā ham ne

bhūlī-bisrī jo koī yaad kahānī aa.ī

ham mohabbat kā bhī mīnār banā sakte the

ham ko nafrat kī na dīvār girānī aa.ī

dekh kar us gul-e-shādāb ko ik mahfil meñ

ba.ad muddat ke phir ik yaad purānī aa.ī

aarzū dil ko thī ai 'soz' ġhazal-ḳhvānī kī

raas aa.ī to hameñ marsiya-ḳhvānī aa.ī

un ko dekha to tabiat mein rawani aai

dil ke ujDe hue gulshan pe jawani aai

pyas kya us ki bujhaenge koi aariz-o-lab

lab-e-dariya na jise pyas bujhani aai

garmi-e-ranj-o-alam hi mein basar ki hum ne

zindagi mein to koi rut na suhani aai

us ka unwan tera nam hi rakkha hum ne

bhuli-bisri jo koi yaad kahani aai

hum mohabbat ka bhi minar bana sakte the

hum ko nafrat ki na diwar girani aai

dekh kar us gul-e-shadab ko ek mahfil mein

baad muddat ke phir ek yaad purani aai

aarzu dil ko thi ai 'soz' ghazal-KHwani ki

ras aai to hamein marsiya-KHwani aai