un ko rona to nahin tha han magar rote rahe

un ko ronā to nahīñ thā haañ magar rote rahe

tujh pe ai duniyā sabhī ahl-e-nazar rote rahe

ġham se Dar se dard se had ho ga.ī ḳhushiyoñ se bhī

ham banī-ādam kā qissa muḳhtasar rote rahe

kuchh huā hai bujh chalā hai dhīre dhīre āftāb

shab meñ taare chāñd ko de kar ḳhabar rote rahe

rone vaale ro ke kuchh arse meñ chup bhī ho ga.e

hañsne vaale qahqahoñ meñ umr bhar rote rahe

log ḳhush hote rahe phūloñ ko aksar toḌ kar

aur bāġhoñ meñ ka.ī ḳhālī shajar rote rahe

maut ne to de diyā bīmār ko aa kar sukūñ

haar par apnī magar sab chārāgar rote rahe

sang-e-marmar kī zamīñ vaale hasīñ bangle meñ ham

yaad kar ke apnā vo kachchā sā ghar rote rahe

vo to shah-rag se qarīñ hai us se kyā rakhte bharam

ham musalle par jhukā.e apnā sar rote rahe

un ko rona to nahin tha han magar rote rahe

tujh pe ai duniya sabhi ahl-e-nazar rote rahe

gham se Dar se dard se had ho gai KHushiyon se bhi

hum bani-adam ka qissa muKHtasar rote rahe

kuchh hua hai bujh chala hai dhire dhire aaftab

shab mein tare chand ko de kar KHabar rote rahe

rone wale ro ke kuchh arse mein chup bhi ho gae

hansne wale qahqahon mein umr bhar rote rahe

log KHush hote rahe phulon ko aksar toD kar

aur baghon mein kai KHali shajar rote rahe

maut ne to de diya bimar ko aa kar sukun

haar par apni magar sab chaaragar rote rahe

sang-e-marmar ki zamin wale hasin bangle mein hum

yaad kar ke apna wo kachcha sa ghar rote rahe

wo to shah-rag se qarin hai us se kya rakhte bharam

hum musalle par jhukae apna sar rote rahe