un se kyon dil mila nahin malum

un se kyoñ dil milā nahīñ ma.alūm

ishq kyūñkar huā nahīñ ma.alūm

dost bhī dushmanoñ ke jaise haiñ

kaun hai bā-vafā nahīñ ma.alūm

jo usūloñ pe jaan dete the

kyoñ hue pur-daġhā nahīñ ma.alūm

rahbarī par thā jis kī naaz mujhe

kyoñ hai bhaTkā huā nahīñ ma.alūm

dil kī bāteñ sunā jo karte haiñ

kyā unheñ mudda.ā nahīñ ma.alūm

kyoñ mujhe DhūñDne vo nikle haiñ

guzrā kyā hādisa nahīñ ma.alūm

zulm jo kar rahe haiñ apnoñ par

hoñge kis din fanā nahīñ ma.alūm

apne mohsin ko qaid karte haiñ

lekin us kī ḳhatā nahīñ ma.alūm

aaj tak zālimoñ ko ai 'ayyūb'

sabr kī intihā nahīñ ma.alūm

un se kyon dil mila nahin malum

ishq kyunkar hua nahin malum

dost bhi dushmanon ke jaise hain

kaun hai ba-wafa nahin malum

jo usulon pe jaan dete the

kyon hue pur-dagha nahin malum

rahbari par tha jis ki naz mujhe

kyon hai bhaTka hua nahin malum

dil ki baaten suna jo karte hain

kya unhen muddaa nahin malum

kyon mujhe DhunDne wo nikle hain

guzra kya hadisa nahin malum

zulm jo kar rahe hain apnon par

honge kis din fana nahin malum

apne mohsin ko qaid karte hain

lekin us ki KHata nahin malum

aaj tak zalimon ko ai 'ayyub'

sabr ki intiha nahin malum