un se wo rasm-e-mulaqat chali jati hai

un se vo rasm-e-mulāqāt chalī jaatī hai

ye bhī sau baat meñ ik baat chalī jaatī hai

vahī be-mehrī-e-duniyā kī shikāyat hai jo thī

vahī be-kaifī-e-hālāt chalī jaatī hai

dil se kis tarah haTe sāya-e-vahshat kī abhī

in nigāhoñ kī karāmāt chalī jaatī hai

merī āshufta-mizājī pe vo hañs dete haiñ

yuuñ bhī ik tarz-e-mudārāt chalī jaatī hai

jab se is bazm kā dastūr banī mohr-labī

rasm-e-īhām-o-ishārāt chalī jaatī hai

naam marne pe bhī hai un ke vafādāroñ meñ

kaam ruk jaa.e magar baat chalī jaatī hai

hotā aayā hai ġham-e-zīst ibārat un se

garmī-e-bazm-e-ḳhayālāt chalī jaatī hai

aah bhar lījiye ro lījiye kah lījiye sher

vo girāñ-bārī-e-jazbāt chalī jaatī hai

ham kahāñ bazm-e-gah-e-nāz kahāñ phir ye ġhazal

arz-e-ahvāl-e-shikāyāt chalī jaatī hai

un se wo rasm-e-mulaqat chali jati hai

ye bhi sau baat mein ek baat chali jati hai

wahi be-mehri-e-duniya ki shikayat hai jo thi

wahi be-kaifi-e-haalat chali jati hai

dil se kis tarah haTe saya-e-wahshat ki abhi

in nigahon ki karamat chali jati hai

meri aashufta-mizaji pe wo hans dete hain

yun bhi ek tarz-e-mudaraat chali jati hai

jab se is bazm ka dastur bani mohr-labi

rasm-e-iham-o-ishaaraat chali jati hai

nam marne pe bhi hai un ke wafadaron mein

kaam ruk jae magar baat chali jati hai

hota aaya hai gham-e-zist ibarat un se

garmi-e-bazm-e-KHayalat chali jati hai

aah bhar lijiye ro lijiye kah lijiye sher

wo giran-bari-e-jazbaat chali jati hai

hum kahan bazm-e-gah-e-naz kahan phir ye ghazal

arz-e-ahwal-e-shikayat chali jati hai