unhin ke kaam ilahi mera lahu aae

unhīñ ke kaam ilāhī mirā lahū aa.e

rañgeñ jo haath lahū meñ hinā kī bū aa.e

marīz hosh meñ aa.e na aa.e tū aa.e

jo tū na aa.e tire gesuoñ kī bū aa.e

itāb-e-yār kā is ke sivā javāb na thā

ham aa.e to liye ā.īna rū-ba-rū aa.e

na pī zabān se merā bhī zikr kar denā

kalīm-e-tūr par un se jo guftugū aa.e

na jhuuT bol ki ham shaam se kal ā.eñge

na khā qasam are jhūTī kabhī jo tū aa.e

namāz hogī adā duḳht-e-raz ke dāman par

hamārī bazm meñ jo aa.e bā-vazū aa.e

talab kiye kabhī ham ne agar pas-e-tauba

bahut bhare hue ham se ḳhum-o-subū aa.e

utarne vaale abhī tak na baam se utre

taḌapne vaale taḌap kar falak ko chhū aa.e

garāñ dimāġh vo haiñ bū-e-gul kī tezī se

nasīm kah de zarā halkī ho ke bū aa.e

nisār vasl kī rāteñ us ek saa.at par

ham intizār meñ tere hoñ aur tū aa.e

ye jānte haiñ ki niklā huā hai naam us kā

hasīn hashr meñ kyuuñ mere rū-ba-rū aa.e

khule jo koī to khul kar kisī se bāteñ hoñ

uThe hijāb to kuchh lutf-e-guftugū aa.e

dilā.e yaad jo va.ade to bole jhuñjhlā kar

ye aur hashr meñ lene ko aabrū aa.e

kabhī kī pī huī kaam aa.e aaj hashr ke din

ḳhudā ke sāmne mai-nosh surḳh-rū aa.e

'riyāz' thī jo muqaddar meñ bāz-gasht-e-shabāb

javān hone ko piirī meñ lucknow aa.e

unhin ke kaam ilahi mera lahu aae

rangen jo hath lahu mein hina ki bu aae

mariz hosh mein aae na aae tu aae

jo tu na aae tere gesuon ki bu aae

itab-e-yar ka is ke siwa jawab na tha

hum aae to liye aaina ru-ba-ru aae

na pi zaban se mera bhi zikr kar dena

kalim-e-tur par un se jo guftugu aae

na jhuT bol ki hum sham se kal aaenge

na kha qasam are jhuTi kabhi jo tu aae

namaz hogi ada duKHt-e-raz ke daman par

hamari bazm mein jo aae ba-wazu aae

talab kiye kabhi hum ne agar pas-e-tauba

bahut bhare hue hum se KHum-o-subu aae

utarne wale abhi tak na baam se utre

taDapne wale taDap kar falak ko chhu aae

garan dimagh wo hain bu-e-gul ki tezi se

nasim kah de zara halki ho ke bu aae

nisar wasl ki raaten us ek saat par

hum intizar mein tere hon aur tu aae

ye jaante hain ki nikla hua hai nam us ka

hasin hashr mein kyun mere ru-ba-ru aae

khule jo koi to khul kar kisi se baaten hon

uThe hijab to kuchh lutf-e-guftugu aae

dilae yaad jo wade to bole jhunjhla kar

ye aur hashr mein lene ko aabru aae

kabhi ki pi hui kaam aae aaj hashr ke din

KHuda ke samne mai-nosh surKH-ru aae

'riyaz' thi jo muqaddar mein baz-gasht-e-shabab

jawan hone ko piri mein lucknow aae