uruj-e-dard-e-tamanna hai ab to aa jao

urūj-e-dard-e-tamannā hai ab to aa jaao

hamārā dil yahī kahtā hai ab to aa jaao

nahīñ hai sehn-e-gulistāñ meñ koī hañgāma

hujūm-e-shauq-e-tamannā hai ab to aa jaao

khile haiñ phuul ka.ī aarzū ke gulshan meñ

bas intizār tumhārā hai ab to aa jaao

kabhī kabhī to hasīñ chāñdnī bhī chubhtī hai

kiran kiran meñ añdherā hai ab to aa jaao

na jaane umr kahāñ ye tamām ho jaa.e

abhī hayāt kā lamha hai ab to aa jaao

ham apne dil ke añdheroñ se ḳhud pareshāñ the

charāġh-e-shauq jalāyā hai ab to aa jaao

na saath degī tumhārā bhī 'tāj' tanhā.ī

hamāre saath ye duniyā hai ab to aa jaao

uruj-e-dard-e-tamanna hai ab to aa jao

hamara dil yahi kahta hai ab to aa jao

nahin hai sehn-e-gulistan mein koi hangama

hujum-e-shauq-e-tamanna hai ab to aa jao

khile hain phul kai aarzu ke gulshan mein

bas intizar tumhaara hai ab to aa jao

kabhi kabhi to hasin chandni bhi chubhti hai

kiran kiran mein andhera hai ab to aa jao

na jaane umr kahan ye tamam ho jae

abhi hayat ka lamha hai ab to aa jao

hum apne dil ke andheron se KHud pareshan the

charagh-e-shauq jalaya hai ab to aa jao

na sath degi tumhaara bhi 'taj' tanhai

hamare sath ye duniya hai ab to aa jao