uruj mera hai jo ki duniya samajh rahi hai zawal mera

uruuj merā hai jo ki duniyā samajh rahī hai zavāl merā

khaTak rahā hai nigāh-e-hāsid meñ ḳhaar ban kar kamāl merā

kaTeñ to kyoñ kar kaTeñ bhalā nā-murād din zindagī ke āḳhir

na kuchh ḳhabar mujh ko aap apnī na aap ko kuchh ḳhayāl merā

kahīñ na aañsū bahā.e shabnam kahīñ na kaliyāñ hoñ chaak dāman

tujhe qasam raunaq-e-chaman kī sabā na kah un se haal merā

maiñ partav-e-nūr-e-lam-yazal huuñ fanā-navāz-e-azal kā Dar kyā

kamāl-e-sāne.a kā nuqs hogā agar huā bhī zavāl merā

gunāhgāroñ kī avvalīñ saf se chashm-e-rahmat ne mujh ko chhāñTā

hazār sajdoñ se baḌh ke kaam aaya jazba-e-infi.āl merā

kise ḳhabar hai ki ho adā farz-e-bandagī phir bhī mujh se 'qaisar'

zabān-e-shukr-o-sipās bhī ban gayā agar baal baal merā

uruj mera hai jo ki duniya samajh rahi hai zawal mera

khaTak raha hai nigah-e-hasid mein KHar ban kar kamal mera

kaTen to kyon kar kaTen bhala na-murad din zindagi ke aaKHir

na kuchh KHabar mujh ko aap apni na aap ko kuchh KHayal mera

kahin na aansu bahae shabnam kahin na kaliyan hon chaak daman

tujhe qasam raunaq-e-chaman ki saba na kah un se haal mera

main partaw-e-nur-e-lam-yazal hun fana-nawaz-e-azal ka Dar kya

kamal-e-sanea ka nuqs hoga agar hua bhi zawal mera

gunahgaron ki awwalin saf se chashm-e-rahmat ne mujh ko chhanTa

hazar sajdon se baDh ke kaam aaya jazba-e-infial mera

kise KHabar hai ki ho ada farz-e-bandagi phir bhi mujh se 'qaisar'

zaban-e-shukr-o-sipas bhi ban gaya agar baal baal mera