us bazm se palTe hain to ghafil se mile hain

us bazm se palTe haiñ to ġhāfil se mile haiñ

aksar to ham apne ko bhī mushkil se mile haiñ

insān ko hamdardī-e-insān ke ehsās

rāhat se nahīñ karb kī mahfil se mile haiñ

ye vaqt kī ḳhūbī hai ki fankār se fankār

kis dil se milā karte the kis dil se mile haiñ

dariyā ne taras khā ke Duboyā nahīñ jis ko

tūfān usī naav ko sāhil se mile haiñ

mālūm hai jin ko safar-e-ishq kā anjām

manzil kī tarah vo ġham-e-manzil se mile haiñ

dekhā to ba-zāhir vo dikhā.ī nahīñ dete

sochā to har ik chiiz meñ shāmil se mile haiñ

kuchh roz se us rashk-e-mohabbat kī badaulat

dil ham se milā aur na ham dil se mile haiñ

kyā hogā tirā ai safar-e-ulfat-e-insāñ

rahbar bhī to gum-karda-e-manzil se mile haiñ

ye daur 'nihāl' asl meñ vo daur hai jis meñ

DhūñDā hai to insān bhī mushkil se mile haiñ

us bazm se palTe hain to ghafil se mile hain

aksar to hum apne ko bhi mushkil se mile hain

insan ko hamdardi-e-insan ke ehsas

rahat se nahin karb ki mahfil se mile hain

ye waqt ki KHubi hai ki fankar se fankar

kis dil se mila karte the kis dil se mile hain

dariya ne taras kha ke Duboya nahin jis ko

tufan usi naw ko sahil se mile hain

malum hai jin ko safar-e-ishq ka anjam

manzil ki tarah wo gham-e-manzil se mile hain

dekha to ba-zahir wo dikhai nahin dete

socha to har ek chiz mein shamil se mile hain

kuchh roz se us rashk-e-mohabbat ki badaulat

dil hum se mila aur na hum dil se mile hain

kya hoga tera ai safar-e-ulfat-e-insan

rahbar bhi to gum-karda-e-manzil se mile hain

ye daur 'nihaal' asl mein wo daur hai jis mein

DhunDa hai to insan bhi mushkil se mile hain