us but ne gulabi jo uTha munh se lagai

us but ne gulābī jo uThā muñh se lagā.ī

shīshe meñ ajab aan se jhamke thī ḳhudā.ī

aalam meñ nashe ke shab-e-mahtāb ne tere

ḳhurshīd se mukhḌe ne tilismāt dikhā.ī

go ġhair se milne kī qasam khāte ho pyāre

chhuptī nahīñ vo baat jo ho dil se banā.ī

vallāh hameñ ishq kī sab bhuul huī chaal

kāfir tirī raftār ne phir yaad dilā.ī

har dam to bharā shīsha jhukātā hai nashe meñ

Dartā huuñ ki terī na muḌak jaa.e kalā.ī

ā.īna numū-posh huā ishq meñ tere

chaar abaruoñ kī le ke faqīrāna safā.ī

ham jhuuT kaheñ to na ho dīdār ḳhudā kā

hai roz-e-qayāmat tirī ik shab kī judā.ī

āshiq ko 'muhib' saltanat-e-har-do-jahāñ hai

gar yaar ke kūche kī mayassar ho gadā.ī

us but ne gulabi jo uTha munh se lagai

shishe mein ajab aan se jhamke thi KHudai

aalam mein nashe ke shab-e-mahtab ne tere

KHurshid se mukhDe ne tilismat dikhai

go ghair se milne ki qasam khate ho pyare

chhupti nahin wo baat jo ho dil se banai

wallah hamein ishq ki sab bhul hui chaal

kafir teri raftar ne phir yaad dilai

har dam to bhara shisha jhukata hai nashe mein

Darta hun ki teri na muDak jae kalai

aaina numu-posh hua ishq mein tere

chaar abaruon ki le ke faqirana safai

hum jhuT kahen to na ho didar KHuda ka

hai roz-e-qayamat teri ek shab ki judai

aashiq ko 'muhib' saltanat-e-har-do-jahan hai

gar yar ke kuche ki mayassar ho gadai