us ka jawab milna jahan mein muhaal hai

us kā javāb milnā jahāñ meñ muhāl hai

vo husn-e-lā-javāb ḳhud apnī misāl hai

ye aur baat hai ki na hoñ un ko iltifāt

vo ḳhuub jānte haiñ hamārā jo haal hai

tālib koī hai ek karam kī nigāh kā

kiije na rad kisī kā ye pahlā savāl hai

jitne haiñ duur utne hī dil ke qarīb haiñ

ham ko to daur-e-hijr bhī daur-e-visāl hai

ham bāda-kash to mai ko samajhte haiñ zindagī

ai vā.iz-e-buzurg tirā kyā ḳhayāl hai

duniyā meñ bā-kamāl mileñge galī galī

maiñ be-kamāl huuñ yahī merā kamāl hai

'shā.eq' tirī nazar kī javānī na jā.egī

pinhāñ tirī nazar meñ kisī kā jamāl hai

us ka jawab milna jahan mein muhaal hai

wo husn-e-la-jawab KHud apni misal hai

ye aur baat hai ki na hon un ko iltifat

wo KHub jaante hain hamara jo haal hai

talib koi hai ek karam ki nigah ka

kije na rad kisi ka ye pahla sawal hai

jitne hain dur utne hi dil ke qarib hain

hum ko to daur-e-hijr bhi daur-e-visal hai

hum baada-kash to mai ko samajhte hain zindagi

ai waiz-e-buzurg tera kya KHayal hai

duniya mein ba-kamal milenge gali gali

main be-kamal hun yahi mera kamal hai

'shaeq' teri nazar ki jawani na jaegi

pinhan teri nazar mein kisi ka jamal hai