us kakul-e-pur-KHam ka KHalal jae to achchha

us kākul-e-pur-ḳham kā ḳhalal jaa.e to achchhā

dil sar se balā tere ye Tal jaa.e to achchhā

bose kā savāl us se karūñ huuñ to kahe hai

chal re mire kuchh muñh se nikal jaa.e to achchhā

isbāt na ho dāva-e-ḳhūñ us pe ilāhī

sūrat mire qātil kī badal jaa.e to achchhā

le sar pe vabāl apne patañgoñ kā na ai sham.a

tū aur bhī joban se jo Dhal jaa.e to achchhā

Dasne ko mirā dil hai tirī zulf kī nāgin

tā.ūs-ḳhat us ko jo nigal jaa.e to achchhā

ham chashmī terī chashm se kartā hai ye bādām

us ko koī patthar se kuchal jaa.e to achchhā

zulfoñ ke tasarruf meñ hai be-vaj.h ruḳh-e-yār

kuffār kā kaabe se amal jaa.e to achchhā

ḳhuuñ ho ke ravāñ dil ho gar āñkhoñ se to behtar

yā ishq kī ātish meñ ye jal jaa.e to achchhā

lab par se bulāq apnī dam-e-bosa uThā do

andesha-e-zambūr-e-asal jaa.e to achchhā

pahlū se nikal jaa.e agar dil to balā se

tū chhoḌ ke ḳhālī na baġhal jaa.e to achchhā

kahte haiñ 'nasīr' apnī na tum aah ko roko

ye tiir nishāne pe jo chal jaa.e to achchhā

us kakul-e-pur-KHam ka KHalal jae to achchha

dil sar se bala tere ye Tal jae to achchha

bose ka sawal us se karun hun to kahe hai

chal re mere kuchh munh se nikal jae to achchha

isbaat na ho dawa-e-KHun us pe ilahi

surat mere qatil ki badal jae to achchha

le sar pe wabaal apne patangon ka na ai shama

tu aur bhi joban se jo Dhal jae to achchha

Dasne ko mera dil hai teri zulf ki nagin

taus-KHat us ko jo nigal jae to achchha

hum chashmi teri chashm se karta hai ye baadam

us ko koi patthar se kuchal jae to achchha

zulfon ke tasarruf mein hai be-wajh ruKH-e-yar

kuffar ka kabe se amal jae to achchha

KHun ho ke rawan dil ho gar aankhon se to behtar

ya ishq ki aatish mein ye jal jae to achchha

lab par se bulaq apni dam-e-bosa uTha do

andesha-e-zambur-e-asal jae to achchha

pahlu se nikal jae agar dil to bala se

tu chhoD ke KHali na baghal jae to achchha

kahte hain 'nasir' apni na tum aah ko roko

ye tir nishane pe jo chal jae to achchha