uske harim-e-naz mein tera guzar kahan

us ke harīm-e-nāz meñ terā guzar kahāñ

ai dil ye sach batā ki rahā raat bhar kahāñ

manzil se duur gum-shuda-e-kārvāñ huuñ maiñ

aa.eñ mirī madad ke liye haiñ ḳhizar kahāñ

uzlat-nashīn-e-ḳhalvat-o-mast-e-ḳhayāl ban

phirtā rahegā ḳhaak banā dar-ba-dar kahāñ

majbūr-e-ishq huuñ ki uThātā huuñ apne haath

go jāntā huuñ maiñ ki duā meñ asar kahāñ

ik dāstān-e-shauq mire dil meñ hai abhī

bāteñ huī haiñ yaar se jī khol kar kahāñ

vo mere ghar pe aa.eñ na aa.eñ bulā hī leñ

'ejāz' merā aisā muqaddar magar kahāñ

us ke harim-e-naz mein tera guzar kahan

ai dil ye sach bata ki raha raat bhar kahan

manzil se dur gum-shuda-e-karwan hun main

aaen meri madad ke liye hain KHizar kahan

uzlat-nashin-e-KHalwat-o-mast-e-KHayal ban

phirta rahega KHak bana dar-ba-dar kahan

majbur-e-ishq hun ki uThata hun apne hath

go jaanta hun main ki dua mein asar kahan

ek dastan-e-shauq mere dil mein hai abhi

baaten hui hain yar se ji khol kar kahan

wo mere ghar pe aaen na aaen bula hi len

'ejaz' mera aisa muqaddar magar kahan