uske lahje ka wo utar chaDhao

us ke lahje kā vo utaar chaḌhāo

raat kī narm rau nadī kā bahāo

us kī āñkhoñ ke vasf kyā likkhūñ

jaise ḳhvāboñ kā be-karāñ Thahrāo

un nigāhoñ kī guftugū meñ hai

niind meñ gum havāoñ kā uljhāo

us badan kī nazākateñ mat pūchh

shīsha-e-gul meñ chāñd kā lahrāo

niind kī vādiyoñ meñ pichhle pahar

ek lai ek naġhma ek alaao

aisī tanhā.ī kā mudāvā kyā

saat dariyāoñ meñ akelī naav

un laboñ kī vo bosa bosa uThān

aur palkoñ kā nashsha nashsha jhukāo

us galī us dayār kī ḳhush-bū

ai subuk-sair narm-gām havāo

naujavānī meñ maut kī ḳhvāhish

tum hī samjhā sako to kuchh samjhāo

jaane vo ġhuncha kis chaman kā hai

jis meñ gum hai bahār kā phailāo

raat kahtī hai mujh ko pyaar se dekh

mujh meñ hai chashm-e-yār kā gahrāo

shola-e-jāñ hai bujhne ko 'jāved'

aur dil meñ dahak rahā hai alaao

us ke lahje ka wo utar chaDhao

raat ki narm rau nadi ka bahao

us ki aankhon ke wasf kya likkhun

jaise KHwabon ka be-karan Thahrao

un nigahon ki guftugu mein hai

nind mein gum hawaon ka uljhao

us badan ki nazakaten mat puchh

shisha-e-gul mein chand ka lahrao

nind ki wadiyon mein pichhle pahar

ek lai ek naghma ek alao

aisi tanhai ka mudawa kya

sat dariyaon mein akeli naw

un labon ki wo bosa bosa uThan

aur palkon ka nashsha nashsha jhukao

us gali us dayar ki KHush-bu

ai subuk-sair narm-gam hawao

naujawani mein maut ki KHwahish

tum hi samjha sako to kuchh samjhao

jaane wo ghuncha kis chaman ka hai

jis mein gum hai bahaar ka phailao

raat kahti hai mujh ko pyar se dekh

mujh mein hai chashm-e-yar ka gahrao

shola-e-jaan hai bujhne ko 'jawed'

aur dil mein dahak raha hai alao