uski mahfil mein ja ke lauT aae

us kī mahfil meñ jā ke lauT aa.e

ham bhī chehra dikhā ke lauT aa.e

tilmilāne kī baat thī jis par

ham faqat muskurā ke lauT aa.e

ham ga.e the butoñ kī bastī meñ

ḳhud ko ik but banā ke lauT aa.e

kuchh bhī rakkhā nahīñ bayābāñ meñ

ham bhī kuchh din bitā ke lauT aa.e

qissa-goī kā hī zamāna thā

ham bhī qisse sunā ke lauT aa.e

vo bhī dāman bachā ke guzrā thā

ham bhī nazreñ churā ke lauT aa.e

ham jo duniyā badalne nikle the

sirf fitna uThā ke lauT aa.e

us ki mahfil mein ja ke lauT aae

hum bhi chehra dikha ke lauT aae

tilmilane ki baat thi jis par

hum faqat muskura ke lauT aae

hum gae the buton ki basti mein

KHud ko ek but bana ke lauT aae

kuchh bhi rakkha nahin bayaban mein

hum bhi kuchh din bita ke lauT aae

qissa-goi ka hi zamana tha

hum bhi qisse suna ke lauT aae

wo bhi daman bacha ke guzra tha

hum bhi nazren chura ke lauT aae

hum jo duniya badalne nikle the

sirf fitna uTha ke lauT aae