uski taswir kya lagi hui hai

us kī tasvīr kyā lagī huī hai

puure kamre meñ raushnī huī hai

kuchh bhī tartīb meñ nahīñ thā yahāñ

us ke aane se behtarī huī hai

kaise kah duuñ maiñ hāl-e-dil us se

vo mire sāmne baḌī huī hai

jiit jaatī hai mujh se bātoñ meñ

baḌe schōl kī paḌhī huī hai

dost to vo bahut purānī thī

haañ mohabbat na.ī na.ī huī hai

us ke rone se mausamoñ meñ namī

us ke hañsne se dhuup sī huī hai

mere she'roñ meñ aur kuchh na sahī

us kī ḳhushbū rachī-basī huī hai

ab to hālāt kaafī behtar haiñ

varna pahle to shā'irī huī hai

aap mat DhūñDhiyegā kuchh is meñ

ye ġhazal us ke naam kī huī hai

us ki taswir kya lagi hui hai

pure kamre mein raushni hui hai

kuchh bhi tartib mein nahin tha yahan

us ke aane se behtari hui hai

kaise kah dun main haal-e-dil us se

wo mere samne baDi hui hai

jit jati hai mujh se baaton mein

baDe school ki paDhi hui hai

dost to wo bahut purani thi

han mohabbat nai nai hui hai

us ke rone se mausamon mein nami

us ke hansne se dhup si hui hai

mere she'ron mein aur kuchh na sahi

us ki KHushbu rachi-basi hui hai

ab to haalat kafi behtar hain

warna pahle to sha'iri hui hai

aap mat DhunDhiyega kuchh is mein

ye ghazal us ke nam ki hui hai