uski timsal ko pane mein zamane lag jaen

us kī timsāl ko paane meñ zamāne lag jaa.eñ

ham agar ā.īna-ḳhānoñ hī meñ jaane lag jaa.eñ

kyā tamāshā hai ki jab bikne pe raazī ho ye dil

ahl-e-bāzār dukānoñ ko baḌhāne lag jaa.eñ

paañv meñ ḳhaak hī zanjīr-e-girāñ hai ki nahīñ

pūchhnā log jab is shahr se jaane lag jaa.eñ

āshiqī ke bhī kuchh ādāb huā karte haiñ

zaḳhm khāyā hai to kyā hashr uThāne lag jaa.eñ

aur kis tarah kareñ husn-e-ḳhudā-dād kā shukr

sher likhne lageñ tasvīr banāne lag jaa.eñ

kuchh to zāhir ho ki haiñ jashn meñ shāmil ham log

kuchh nahīñ hai to chalo ḳhaak uḌāne lag jaa.eñ

us ki timsal ko pane mein zamane lag jaen

hum agar aaina-KHanon hi mein jaane lag jaen

kya tamasha hai ki jab bikne pe raazi ho ye dil

ahl-e-bazar dukanon ko baDhane lag jaen

panw mein KHak hi zanjir-e-giran hai ki nahin

puchhna log jab is shahr se jaane lag jaen

aashiqi ke bhi kuchh aadab hua karte hain

zaKHm khaya hai to kya hashr uThane lag jaen

aur kis tarah karen husn-e-KHuda-dad ka shukr

sher likhne lagen taswir banane lag jaen

kuchh to zahir ho ki hain jashn mein shamil hum log

kuchh nahin hai to chalo KHak uDane lag jaen