usne hathon mein jab le liya aaina

us ne hāthoñ meñ jab le liyā aa.ina

sāmne aa.ine ke huā aa.ina

un ke dast-e-hunar kā ye e'jāz hai

ek patthar thā maiñ ho gayā aa.ina

aa.ine kī taraf se vo guzre the bas

der tak un ko taktā rahā aa.ina

husn par us ko apne thā itnā gumāñ

zindagī bhar badaltā rahā aa.ina

hāl-e-dil us pe yuuñ munkashif ho gayā

merā chehra hī jab ho gayā aa.ina

zindagī kā yahī un kī 'unvān hai

aa.ina aa.ina aa.ina aa.ina

jhuuT ko jhuuT sach ko jo sach kah diyā

sang-bārī kī zad meñ rahā aa.ina

jo uThāte haiñ tum par sadā uñgliyāñ

tum bhī un ko dikhā do zarā aa.ina

'ishq-o-ulfat kī 'dānish' ye me'rāj hai

maiñ tirā aa.ina tū mirā aa.ina

us ne hathon mein jab le liya aaina

samne aaine ke hua aaina

un ke dast-e-hunar ka ye e'jaz hai

ek patthar tha main ho gaya aaina

aaine ki taraf se wo guzre the bas

der tak un ko takta raha aaina

husn par us ko apne tha itna guman

zindagi bhar badalta raha aaina

haal-e-dil us pe yun munkashif ho gaya

mera chehra hi jab ho gaya aaina

zindagi ka yahi un ki 'unwan hai

aaina aaina aaina aaina

jhuT ko jhuT sach ko jo sach kah diya

sang-bari ki zad mein raha aaina

jo uThate hain tum par sada ungliyan

tum bhi un ko dikha do zara aaina

'ishq-o-ulfat ki 'danish' ye me'raj hai

main tera aaina tu mera aaina