usne jab sine se lagana chhoD diya

us ne jab siine se lagānā chhoḌ diyā

ham ne bhī phir yaad dilānā chhoḌ diyā

tanhā.ī se rishta jab mazbūt huā

mahfil meñ tab aanā jaanā chhoḌ diyā

us ne koī qadr na rakkhī vā'doñ kī

ham ne bhī vā'de ginvānā chhoḌ diyā

us ko puurā karte to mar jaate ham

aadhe pe hī vo afsāna chhoḌ diyā

āñkhoñ kī āvāz kā jaadū dekhā to

us ne lafzoñ se samjhānā chhoḌ diyā

dard ne jis din had se aage paañv rakhā

ham ne apnā dil bahlānā chhoḌ diyā

chand kitābeñ aa.ī haiñ ghar meñ jab se

ghar ke bāhar aanā jaanā chhoḌ diyā

kahīñ mile to us se kahnā dhyān rahe

'meghā' ne ab dhokā khānā chhoḌ diyā

us ne jab sine se lagana chhoD diya

hum ne bhi phir yaad dilana chhoD diya

tanhai se rishta jab mazbut hua

mahfil mein tab aana jaana chhoD diya

us ne koi qadr na rakkhi wa'don ki

hum ne bhi wa'de ginwana chhoD diya

us ko pura karte to mar jate hum

aadhe pe hi wo afsana chhoD diya

aankhon ki aawaz ka jadu dekha to

us ne lafzon se samjhana chhoD diya

dard ne jis din had se aage panw rakha

hum ne apna dil bahlana chhoD diya

chand kitaben aai hain ghar mein jab se

ghar ke bahar aana jaana chhoD diya

kahin mile to us se kahna dhyan rahe

'megha' ne ab dhoka khana chhoD diya