usne kaha tha ek shab tumne mujhe badal diya

us ne kahā thā ek shab tum ne mujhe badal diyā

kaise kahūñ maiñ us se ab tum ne mujhe badal diyā

jaadū asar har ik adā chehra hai yā ki mo.ajiza

dikhlā ke ik hasīn chhab tum ne mujhe badal diyā

dekho mirī sharārteñ shoḳhī bharī ibārateñ

chanchal thā is qadar maiñ kab tum ne mujhe badal diyā

sargoshiyoñ kā maiñ hadaf hairāniyāñ haiñ har taraf

shashdar hai aa.ina ajab tum ne mujhe badal diyā

dil meñ hai yuuñ umañg kyoñ nikhrā huā hai rañg kyoñ

ab pūchhte ho kyā sabab tum ne mujhe badal diyā

ik harf-e-intizār huuñ har aan be-qarār huuñ

'rāġhib' nahīñ rahā maiñ ab tum ne mujhe badal diyā

us ne kaha tha ek shab tum ne mujhe badal diya

kaise kahun main us se ab tum ne mujhe badal diya

jadu asar har ek ada chehra hai ya ki moajiza

dikhla ke ek hasin chhab tum ne mujhe badal diya

dekho meri shararten shoKHi bhari ibaraten

chanchal tha is qadar main kab tum ne mujhe badal diya

sargoshiyon ka main hadaf hairaniyan hain har taraf

shashdar hai aaina ajab tum ne mujhe badal diya

dil mein hai yun umang kyon nikhra hua hai rang kyon

ab puchhte ho kya sabab tum ne mujhe badal diya

ek harf-e-intizar hun har aan be-qarar hun

'raghib' nahin raha main ab tum ne mujhe badal diya