usne kar wasma jo funduq pe jamai mehndi

us ne kar vasma jo funduq pe jamā.ī mehñdī

kyā hī dilchasp mujhe vo nazar aa.ī mehñdī

na rahā ek bhī chor us ke kahīñ hāthoñ meñ

aisī chaturā.ī se kāfir ne lagā.ī mehñdī

baiThe baiThe jo mizāj aa gayā rañgīnī par

gūñdh kar laale kī patī meñ milā.ī mehñdī

is nafāsat kā maiñ kushta huuñ ki ik to us ne

bañgle pānoñ se hāthoñ meñ bañdhā.ī mehñdī

tis pe kam-baḳht kī ye dūsrī saghḌā.ī dekh

bāñdh rumāloñ se bame kī bachā.ī mehñdī

aur hushyārī ye sun sote se jo chauñk paḌā

khol phurtī se vahīñ jald chhuḌā.ī mehñdī

ba.ad-azāñ taaq se ik chhoTe se shīshe ko utaar

itr meñ hāthoñ se mal mal ke basā.ī mehñdī

'mus.hafī' kyuuñ na duā deve ki us ko tū ne

ik ġhazal aur bhī rañgīn likhā.ī mehñdī

us ne kar wasma jo funduq pe jamai mehndi

kya hi dilchasp mujhe wo nazar aai mehndi

na raha ek bhi chor us ke kahin hathon mein

aisi chaturai se kafir ne lagai mehndi

baiThe baiThe jo mizaj aa gaya rangini par

gundh kar lale ki pati mein milai mehndi

is nafasat ka main kushta hun ki ek to us ne

bangle panon se hathon mein bandhai mehndi

tis pe kam-baKHt ki ye dusri saghDai dekh

bandh rumalon se bame ki bachai mehndi

aur hushyari ye sun sote se jo chaunk paDa

khol phurti se wahin jald chhuDai mehndi

baad-azan taq se ek chhoTe se shishe ko utar

itr mein hathon se mal mal ke basai mehndi

'mushafi' kyun na dua dewe ki us ko tu ne

ek ghazal aur bhi rangin likhai mehndi