us se kahun main haal-e-dil-e-dagh-dagh kya

us se kahūñ maiñ hāl-e-dil-e-dāġh-dāġh kyā

hañs kar jo ye kahe ki sajāyā hai baaġh kyā

qabr ek ḳhush-nasīb kī phūloñ se aT ga.ī

yāroñ ke āñsuoñ ne jalā.e charāġh kyā

vo multafit nahīñ haiñ to kyā lutf-e-mai-kashī

ab haiñ nazar meñ hech subū kyā ayāġh kyā

vo mehrbāñ na hoñ to ḳhushī kā kise dimāġh

dil mutma.in na ho to ġham-e-sair-e-bāġh kyā

shabnam ke girya se mirā pahuñchā kahāñ ḳhayāl

ġhuncha hai sīna-e-chamanistāñ kā daaġh kyā

'fitrat' mizāj-e-sher kī garmī na pūchhiye

do she'r kah ke jalne lagā hai dimāġh kyā

us se kahun main haal-e-dil-e-dagh-dagh kya

hans kar jo ye kahe ki sajaya hai bagh kya

qabr ek KHush-nasib ki phulon se aT gai

yaron ke aansuon ne jalae charagh kya

wo multafit nahin hain to kya lutf-e-mai-kashi

ab hain nazar mein hech subu kya ayagh kya

wo mehrban na hon to KHushi ka kise dimagh

dil mutmain na ho to gham-e-sair-e-bagh kya

shabnam ke girya se mera pahuncha kahan KHayal

ghuncha hai sina-e-chamanistan ka dagh kya

'fitrat' mizaj-e-sher ki garmi na puchhiye

do she'r kah ke jalne laga hai dimagh kya