us shoKH se kis tarah kahen dil ki koi baat

us shoḳh se kis tarah kaheñ dil kī koī baat

kar detā hai har ek par iz.hār kahī baat

kis darja tanaffur hai unheñ baat se merī

muñh pherte haiñ maiñ ne agar kī bhī koī baat

kyā kahte ho ushshāq ko marnā nahīñ aatā

achchhā tumhīñ dikhlāo rahī tum se yahī baat

piine ke liye aaya thā maiḳhāne meñ zāhid

kyā ḳhuub hameñ aaj ye saaqī ne kahī baat

gar vasl se inkār hai yuuñ hī sahī lekin

kyoñ karte ho tahzīb ke darje se girī baat

kahte haiñ ki vo husn se maġhlūb kareñge

kuchh uḌtī huī aaj ye ham ne bhī sunī baat

hai hazrat-e-'kāmil' kī bahut achchhī ye aadat

kah dete haiñ har ek se vallāh kharī baat

us shoKH se kis tarah kahen dil ki koi baat

kar deta hai har ek par izhaar kahi baat

kis darja tanaffur hai unhen baat se meri

munh pherte hain main ne agar ki bhi koi baat

kya kahte ho ushshaq ko marna nahin aata

achchha tumhin dikhlao rahi tum se yahi baat

pine ke liye aaya tha maiKHane mein zahid

kya KHub hamein aaj ye saqi ne kahi baat

gar wasl se inkar hai yun hi sahi lekin

kyon karte ho tahzib ke darje se giri baat

kahte hain ki wo husn se maghlub karenge

kuchh uDti hui aaj ye hum ne bhi suni baat

hai hazrat-e-'kaamil' ki bahut achchhi ye aadat

kah dete hain har ek se wallah khari baat