us sitamgār ne sīkhā hai ḳhafā ho jaanā
kyā qayāmat huā nāloñ kā rasā ho jaanā
naza.a meñ baḌh ke khaTak dil se yahī kahtī hai
aaj to dard kā mumkin hai davā ho jaanā
le ke paiġhām-e-qazā bād-e-bahārī aa.ī
nā-mubārak huā zaḳhmoñ kā harā ho jaanā
arsh tharrā.egā aġhyār ke dil TūTeñge
naala kartā huuñ magar tum na ḳhafā ho jaanā
dam nikalnā hai yahī jaan kā jaanā hai yahī
dil kā āsāñ nahīñ pahlū se judā ho jaanā
pas-e-murdan bhī rahe ḳhāna-e-zanjīr meñ paañv
is tarah chāhiye pāband-e-vafā ho jaanā
zalzale aa ke zamāne ko ḳhabar dete haiñ
nahīñ mumkin tapish-e-dil kā fanā ho jaanā
jaan le jā.egā aur dard baḌhā jā.egā
haath terā mire siine se judā ho jaanā
abhī baiThe raho maiñ dekh rahā huuñ tum ko
naza.a ke vaqt gale mil ke judā ho jaanā
samjho kis darja hai soz-e-ġham-e-ulfat dushvār
dekh parvānoñ kā jal jal ke fanā ho jaanā
zahr bhar detā hai zaḳhmoñ meñ dil-e-vahshī ke
fasl-e-bārāñ meñ bayābāñ kā harā ho jaanā
'nāsirī' phir vahī ham haiñ vahī shorīda-sarī
phir vahī hāzir-e-bazm-e-sho.arā ho jaanā
us sitamgar ne sikha hai KHafa ho jaana
kya qayamat hua nalon ka rasa ho jaana
naza mein baDh ke khaTak dil se yahi kahti hai
aaj to dard ka mumkin hai dawa ho jaana
le ke paigham-e-qaza baad-e-bahaari aai
na-mubarak hua zaKHmon ka hara ho jaana
arsh tharraega aghyar ke dil TuTenge
nala karta hun magar tum na KHafa ho jaana
dam nikalna hai yahi jaan ka jaana hai yahi
dil ka aasan nahin pahlu se juda ho jaana
pas-e-murdan bhi rahe KHana-e-zanjir mein panw
is tarah chahiye paband-e-wafa ho jaana
zalzale aa ke zamane ko KHabar dete hain
nahin mumkin tapish-e-dil ka fana ho jaana
jaan le jaega aur dard baDha jaega
hath tera mere sine se juda ho jaana
abhi baiThe raho main dekh raha hun tum ko
naza ke waqt gale mil ke juda ho jaana
samjho kis darja hai soz-e-gham-e-ulfat dushwar
dekh parwanon ka jal jal ke fana ho jaana
zahr bhar deta hai zaKHmon mein dil-e-wahshi ke
fasl-e-baran mein bayaban ka hara ho jaana
'nasiri' phir wahi hum hain wahi shorida-sari
phir wahi hazir-e-bazm-e-shoara ho jaana
Source:
Nazr-e-Ahbab (Pg. 40)
-
Author:
Nasiri Lakhnavi
-
- Publisher: Indian Press, Allahabad
- Year of Publication: 1933
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.