use chhua hi nahin jo meri kitab mein tha
use chhuā hī nahīñ jo mirī kitāb meñ thā
vahī paḌhāyā gayā mujh ko jo nisāb meñ thā
vahī to din the ujāloñ ke phuul chunñe ke
unhīñ dinoñ maiñ añdheroñ ke intiḳhāb meñ thā
bas itnā yaad hai koī bagūlā uTThā thā
phir is ke ba.ad maiñ sahrā-e-iztirāb meñ thā
mirī uruuj kī likkhī thī dāstāñ jis meñ
mire zavāl kā qissa bhī us kitāb meñ thā
balā kā habs thā par niiñd TūTtī hī na thī
na koī dar na darīcha fasīl-e-ḳhvāb meñ thā
bas ek buuñd ke girte hī ho gayā āzād
vo haft-rañg ujālā jo mujh hubāb meñ thā
use chhua hi nahin jo meri kitab mein tha
wahi paDhaya gaya mujh ko jo nisab mein tha
wahi to din the ujalon ke phul chunne ke
unhin dinon main andheron ke intiKHab mein tha
bas itna yaad hai koi bagula uTTha tha
phir is ke baad main sahra-e-iztirab mein tha
meri uruj ki likkhi thi dastan jis mein
mere zawal ka qissa bhi us kitab mein tha
bala ka habs tha par nind TuTti hi na thi
na koi dar na daricha fasil-e-KHwab mein tha
bas ek bund ke girte hi ho gaya aazad
wo haft-rang ujala jo mujh hubab mein tha
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
