use KHalaon ki wusaton ka tajraba hi nahin

use ḳhalāoñ kī vus.atoñ kā tajraba hī nahīñ

vo mere saath kabhī arsh tak gayā hī nahīñ

maiñ is ko aur hī aalam meñ le gayā hotā

zamāna uñglī pakaḌ kar mirī chalā hī nahīñ

har ek chehre pe kitnī ibārateñ haiñ raqam

mirī jabīñ pe to kuchh vaqt ne likhā hī nahīñ

balā-kashān-e-mohabbat meñ hai shumār mirā

ye inkishāf to mujh par kabhī huā hī nahīñ

ba-nām-e-jām-o-subū us ko roknā chāhā

thā vaqt mujh se bhī chālāk vo rukā hī nahīñ

qusūr us kā nahīñ hai qusūr merā hai

maiñ kam-nasībī kī tah tak kabhī gayā hī nahīñ

ik aas zehn ke kone meñ hai abhī mahfūz

ye aur khilaunā hai 'rāhat' jo TūTtā hī nahīñ

use KHalaon ki wusaton ka tajraba hi nahin

wo mere sath kabhi arsh tak gaya hi nahin

main is ko aur hi aalam mein le gaya hota

zamana ungli pakaD kar meri chala hi nahin

har ek chehre pe kitni ibaraten hain raqam

meri jabin pe to kuchh waqt ne likha hi nahin

bala-kashan-e-mohabbat mein hai shumar mera

ye inkishaf to mujh par kabhi hua hi nahin

ba-nam-e-jam-o-subu us ko rokna chaha

tha waqt mujh se bhi chaalak wo ruka hi nahin

qusur us ka nahin hai qusur mera hai

main kam-nasibi ki tah tak kabhi gaya hi nahin

ek aas zehn ke kone mein hai abhi mahfuz

ye aur khilauna hai 'rahat' jo TuTta hi nahin