use kya bhala KHauf-e-tufan hoga

use kyā bhalā ḳhauf-e-tūfān hogā

ḳhudā jis kā yaaro nigahbān hogā

vo insān kyā ḳhaak insān hogā

jo dard-e-mohabbat se anjān hogā

bharosa karoge jahāñ nāḳhudā par

vahīñ Duub jaane kā imkān hogā

ḳhabar kyā thī jis ko samajhte the apnā

vahī ek din dushman-e-jān hogā

mire ghar ko vīrān karne se pahle

samajh le tirā ghar bhī vīrān hogā

muhāfiz jo thā shahr meñ but-kadoñ kā

sunā hai vo kāfir musalmān hogā

diloñ meñ jo ho 'azm-e-mohkam to 'ġhaibī'

har ik kār-e-dushvār āsān hogā

use kya bhala KHauf-e-tufan hoga

KHuda jis ka yaro nigahban hoga

wo insan kya KHak insan hoga

jo dard-e-mohabbat se anjaan hoga

bharosa karoge jahan naKHuda par

wahin Dub jaane ka imkan hoga

KHabar kya thi jis ko samajhte the apna

wahi ek din dushman-e-jaan hoga

mere ghar ko viran karne se pahle

samajh le tera ghar bhi viran hoga

muhafiz jo tha shahr mein but-kadon ka

suna hai wo kafir musalman hoga

dilon mein jo ho 'azm-e-mohkam to 'ghaibi'

har ek kar-e-dushwar aasan hoga