use pasand hain jo roz-o-shab tamashe hain

use pasand haiñ jo roz-o-shab tamāshe haiñ

tamāshbīn kī duniyā hī ab tamāshe haiñ

hamārī qaum ko jab se milī hai āzādī

hamāre mulk meñ jaarī ajab tamāshe haiñ

tujhe tarīqat-e-ushshāq kī ḳhabar hī nahīñ

tirī nigāh meñ vo chashm-o-lab tamāshe haiñ

tamāshā dekhne vāloñ pe sehr taarī hai

tamāshā dekhne vaale bhī ab tamāshe haiñ

bahut sī āñkhoñ ko is baat kī bhanak hī nahīñ

idhar udhar jo tamāshā-talab tamāshe haiñ

vo shakl jab na rahī zindagī ke mele meñ

fuzūl merī nigāhoñ meñ sab tamāshe haiñ

dil-o-nigāh pe ik bojh ban chuke 'yāvar'

jo in dinoñ sar-e-shahr-e-adab tamāshe haiñ

use pasand hain jo roz-o-shab tamashe hain

tamashbin ki duniya hi ab tamashe hain

hamari qaum ko jab se mili hai aazadi

hamare mulk mein jari ajab tamashe hain

tujhe tariqat-e-ushshaq ki KHabar hi nahin

teri nigah mein wo chashm-o-lab tamashe hain

tamasha dekhne walon pe sehr tari hai

tamasha dekhne wale bhi ab tamashe hain

bahut si aankhon ko is baat ki bhanak hi nahin

idhar udhar jo tamasha-talab tamashe hain

wo shakl jab na rahi zindagi ke mele mein

fuzul meri nigahon mein sab tamashe hain

dil-o-nigah pe ek bojh ban chuke 'yawar'

jo in dinon sar-e-shahr-e-adab tamashe hain