usi ke jalwe the lekin visal-e-yar na tha

usī ke jalve the lekin visāl-e-yār na thā

maiñ us ke vāste kis vaqt be-qarār na thā

koī jahān meñ kyā aur tarah-dār na thā

tirī tarah mujhe dil par to iḳhtiyār na thā

ḳhirām-e-jalva ke naqsh-e-qadam the lāla-o-gul

kuchh aur is ke sivā mausam-e-bahār na thā

ġhalat hai hukm-e-jahannam kise huā hogā

ki mujh se baḌh ke to koī gunāhgār na thā

lahad ko khol ke dekho to ab kafan bhī nahīñ

koī libās na thā jo ki musta'ār na thā

tū mahv-e-gulban-o-gulzār ho gayā 'āsī'

tirī nazar meñ ḳhayāl-e-jamāl-e-yār na thā

usi ke jalwe the lekin visal-e-yar na tha

main us ke waste kis waqt be-qarar na tha

koi jahan mein kya aur tarah-dar na tha

teri tarah mujhe dil par to iKHtiyar na tha

KHiram-e-jalwa ke naqsh-e-qadam the lala-o-gul

kuchh aur is ke siwa mausam-e-bahaar na tha

ghalat hai hukm-e-jahannam kise hua hoga

ki mujh se baDh ke to koi gunahgar na tha

lahad ko khol ke dekho to ab kafan bhi nahin

koi libas na tha jo ki musta'ar na tha

tu mahw-e-gulban-o-gulzar ho gaya 'asi'

teri nazar mein KHayal-e-jamal-e-yar na tha