usi ne pyar baKHsha aur usi ne bandagi baKHshi

usī ne pyaar baḳhshā aur usī ne bandagī baḳhshī

mire mālik ne mujh ko is jahāñ kī har ḳhushī baḳhshī

adīboñ se bharī mahfil meñ aanā thā kahāñ mumkin

usī ne sher likhvā.e usī ne shā.irī baḳhshī

maiñ sāgar thā mujhe ḳhārā nahīñ rahne diyā us ne

ki lahrātī sī bal khātī mohabbat kī nadī baḳhshī

añdheroñ ke ghane sāyoñ kā qabza thā tabhī rab ne

rihā.ī un se dilvā.ī bashar ko raushnī baḳhshī

ḳhushī aur ġham meñ kyā hai farq ye mahsūs karne ko

sabhī ko dil diyā ik aur āñkhoñ ko namī baḳhshī

tirī kārī-garī ke sab haiñ dīvāne mire maulā

sitāre arsh ko baḳhshe zamīñ ko zindagī baḳhshī

'rajat' kī ziist guzregī mohabbat ke binā kaise

yahī sochā tabhī to rab ne us ko dostī baḳhshī

usi ne pyar baKHsha aur usi ne bandagi baKHshi

mere malik ne mujh ko is jahan ki har KHushi baKHshi

adibon se bhari mahfil mein aana tha kahan mumkin

usi ne sher likhwae usi ne shairi baKHshi

main sagar tha mujhe KHara nahin rahne diya us ne

ki lahraati si bal khati mohabbat ki nadi baKHshi

andheron ke ghane sayon ka qabza tha tabhi rab ne

rihai un se dilwai bashar ko raushni baKHshi

KHushi aur gham mein kya hai farq ye mahsus karne ko

sabhi ko dil diya ek aur aankhon ko nami baKHshi

teri kari-gari ke sab hain diwane mere maula

sitare arsh ko baKHshe zamin ko zindagi baKHshi

'rajat' ki zist guzregi mohabbat ke bina kaise

yahi socha tabhi to rab ne us ko dosti baKHshi