utar ke dhup jab aaegi shab ke zine se

utar ke dhuup jab aa.egī shab ke ziine se

uḌegī ḳhuun kī ḳhushbū mire pasīne se

maiñ vo ġharīb ki huuñ chand be-sadā alfāz

adā huī na koī baat bhī qarīne se

guzishta raat bahut jhuum ke ghaTā barsī

magar vo aag jo lipTī huī hai siine se

lahū kā chīḳhtā dariyā dhyān meñ rakhnā

kisī kī pyaas bujhī hai na os piine se

vo saañp jis ko bahut duur dafn kar aa.e

palaT na aa.e kahīñ vaqt ke dafīne se

diloñ ko mauj-e-balā raas aa ga.ī shāyad

rahī na koī shikāyat kisī safīne se

vajūd shola-e-sayyāl ho gayā hai 'shamīm'

uThī hai aañch ajab dil ke ābgīne se

utar ke dhup jab aaegi shab ke zine se

uDegi KHun ki KHushbu mere pasine se

main wo gharib ki hun chand be-sada alfaz

ada hui na koi baat bhi qarine se

guzishta raat bahut jhum ke ghaTa barsi

magar wo aag jo lipTi hui hai sine se

lahu ka chiKHta dariya dhyan mein rakhna

kisi ki pyas bujhi hai na os pine se

wo sanp jis ko bahut dur dafn kar aae

palaT na aae kahin waqt ke dafine se

dilon ko mauj-e-bala ras aa gai shayad

rahi na koi shikayat kisi safine se

wajud shola-e-sayyal ho gaya hai 'shamim'

uThi hai aanch ajab dil ke aabgine se