uTha kar barq-o-baran se nazar manjdhaar par rakhna

uThā kar barq-o-bārāñ se nazar mañjdhār par rakhnā

hamesha ke liye ye haath ab patvār par rakhnā

visālī mausamoñ kī bāzyābī chāhne vaalo

bajā.e shāḳh-e-gul dast-e-talab ruḳhsār par rakhnā

sar-e-taḳhlīq tan kab iḳhtirā.ī dhun nikal aa.e

zarā ye hoñT tum barbat ke TuuTe taar par rakhnā

vabāl-e-dosh thā ye tum kisī kone pe likh denā

numā.ish ke liye jab sar sutūn-e-dār par rakhnā

baqā-e-nau-e-insānī kī ḳhātir chāhtā huuñ maiñ

ab apne aap ko bārūd ke ambār par rakhnā

vo kirnoñ se bharī do-pahriyāñ ab yaad aatī haiñ

fatāda barg uThānā saaya ik ashjār par rakhnā

'zubair' aqvām-e-ālam meñ bhī ho tash.hīr vahshat kī

garebānoñ ke ye TukḌe ḳhat-e-āsār par rakhnā

uTha kar barq-o-baran se nazar manjdhaar par rakhna

hamesha ke liye ye hath ab patwar par rakhna

visali mausamon ki bazyabi chahne walo

bajae shaKH-e-gul dast-e-talab ruKHsar par rakhna

sar-e-taKHliq tan kab iKHtirai dhun nikal aae

zara ye honT tum barbat ke TuTe tar par rakhna

wabaal-e-dosh tha ye tum kisi kone pe likh dena

numaish ke liye jab sar sutun-e-dar par rakhna

baqa-e-nau-e-insani ki KHatir chahta hun main

ab apne aap ko barud ke ambar par rakhna

wo kirnon se bhari do-pahriyan ab yaad aati hain

fatada barg uThana saya ek ashjar par rakhna

'zubair' aqwam-e-alam mein bhi ho tashhir wahshat ki

garebanon ke ye TukDe KHat-e-asar par rakhna