uTha ke mere zehn se shabab koi le gaya

uThā ke mere zehn se shabāb koī le gayā

añdhere chīḳhte haiñ āftāb koī le gayā

maiñ saare kāġhzāt le ke dekhtā hī rah gayā

savāb koī le gayā 'azāb koī le gayā

supurd kar ke ḳhāmushī kī mohr-e-ḳhush-numā mujhe

laboñ se na.ara-hā-e-inqalāb koī le gayā

hai e'tirāf mere haath meñ jo ek chiiz thī

sañbhāl kar rakhā to thā janāb koī le gayā

ye ġham nahīñ ki mujh ko jāgnā paḌā hai 'umr bhar

ye rañj hai ki mere saare ḳhvāb koī le gayā

shajar shajar varaq varaq payām-bar vahāñ bhī hai

jahāñ se har sahīfa har kitāb koī le gayā

shanāḳht ho sakī na phir bhī ye mirā qusūr thā

hamāre darmiyāñ thā jo hijāb koī le gayā

uTha ke mere zehn se shabab koi le gaya

andhere chiKHte hain aaftab koi le gaya

main sare kaghzat le ke dekhta hi rah gaya

sawab koi le gaya 'azab koi le gaya

supurd kar ke KHamushi ki mohr-e-KHush-numa mujhe

labon se nara-ha-e-inqalab koi le gaya

hai e'tiraf mere hath mein jo ek chiz thi

sanbhaal kar rakha to tha janab koi le gaya

ye gham nahin ki mujh ko jagna paDa hai 'umr bhar

ye ranj hai ki mere sare KHwab koi le gaya

shajar shajar waraq waraq payam-bar wahan bhi hai

jahan se har sahifa har kitab koi le gaya

shanaKHt ho saki na phir bhi ye mera qusur tha

hamare darmiyan tha jo hijab koi le gaya