uTha rahe ho jo yun apne aastan se mujhe

uThā rahe ho jo yuuñ apne āstāñ se mujhe

nikāl kyuuñ nahīñ dete ho dāstāñ se mujhe

ḳhabar nahīñ hai ki maiñ kis ghaḌī chalā jā.ūñ

sadā.eñ aane lagīñ ab to āsmāñ se mujhe

ye jāntā hī nahīñ huuñ kahāñ maiñ bhuul aayā

vo ek raaz jo kahnā thā rāz-dāñ se mujhe

nikāl saktā nahīñ huuñ maiñ dil se hubb-e-husain

virāsatoñ meñ milī jo ki apnī maañ se mujhe

maiñ jāntā huuñ agar aaj tum gañvā doge

talāsh karnā hai kal tum ne phir yahāñ se mujhe

jo zaḳhm zaḳhm huuñ ta.anoñ ke tiir khā khā ke

to maar kyuuñ nahīñ dete ho ab ke jaañ se mujhe

guzar gayā hai jo lamha vo phir nahīñ aayā

milā hai dars yahī umr-e-rā.egāñ se mujhe

pahuñch to jā.ūñgā maiñ bhī yaqīñ ke sāhil par

nikāle koī to 'arshad' par is gumāñ se mujhe

uTha rahe ho jo yun apne aastan se mujhe

nikal kyun nahin dete ho dastan se mujhe

KHabar nahin hai ki main kis ghaDi chala jaun

sadaen aane lagin ab to aasman se mujhe

ye jaanta hi nahin hun kahan main bhul aaya

wo ek raaz jo kahna tha raaz-dan se mujhe

nikal sakta nahin hun main dil se hubb-e-husain

wirasaton mein mili jo ki apni man se mujhe

main jaanta hun agar aaj tum ganwa doge

talash karna hai kal tum ne phir yahan se mujhe

jo zaKHm zaKHm hun tanon ke tir kha kha ke

to mar kyun nahin dete ho ab ke jaan se mujhe

guzar gaya hai jo lamha wo phir nahin aaya

mila hai dars yahi umr-e-raegan se mujhe

pahunch to jaunga main bhi yaqin ke sahil par

nikale koi to 'arshad' par is guman se mujhe