uTho rida-e-raunat ko tar tar karen

uTho ridā-e-ra.ūnat ko taar taar kareñ

ḳhudā ke naam pe insāniyat se pyaar kareñ

chalo chaman meñ charāġhāñ ba-sad vaqār kareñ

baḌho hayāt ke dāman ko lāla-zār kareñ

na.ī fazā.eñ na.ī nik.hateñ na.ī rāheñ

gul-e-murād se dāman ko mushk-bār kareñ

bhaTak na jaa.e ye insān aaj rāhoñ meñ

nishān-e-manzil-e-maqsūd ustuvār kareñ

ufuq ke paar jo mauj-e-shamīm bikhrī hai

usī se ġhuncha-e-ḳhātir ko mushk-bār kareñ

falak pe aaj sitāroñ ko DhūñDne vaale

mirī nazar ke sitāroñ kā kuchh shumār kareñ

'azīz' aaj ġham-e-dil kī dāstāñ kah kar

vo chāhte haiñ zamāne ko sogvār kareñ

uTho rida-e-raunat ko tar tar karen

KHuda ke nam pe insaniyat se pyar karen

chalo chaman mein charaghan ba-sad waqar karen

baDho hayat ke daman ko lala-zar karen

nai fazaen nai nikhaten nai rahen

gul-e-murad se daman ko mushk-bar karen

bhaTak na jae ye insan aaj rahon mein

nishan-e-manzil-e-maqsud ustuwar karen

ufuq ke par jo mauj-e-shamim bikhri hai

usi se ghuncha-e-KHatir ko mushk-bar karen

falak pe aaj sitaron ko DhunDne wale

meri nazar ke sitaron ka kuchh shumar karen

'aziz' aaj gham-e-dil ki dastan kah kar

wo chahte hain zamane ko sogwar karen